HISHIMIWE INTABWE YATEWE MU KUGABANYA IGWINGIRA BASABWA KUTIRARA.

kwizihiza Umunsi w’Amarerero ku rwego rw’Akarere ka Nyaruguru, Umuyobozi w’Akarere wungirije ushinzwe Imibereho Myiza y’Abaturage, Assoumpta Byukusenge, yasabye ababyeyi bo mu Murenge wa Kivu gushyira imbaraga mu kurwanya igwingira n’imirire mibi mu bana bato, babajyana mu marerero ndetse bakabategurira indyo yuzuye.

Mu birori byo kwizihiza umunsi w’Amarerero ku rwego rw’Akarere ka Nyaruguru byabereye mu Murenge wa Kivu kuwa 28 Gicurasi 2026, byabereyemo n’ibikorwa bitandukanye birimo kugaburira abana bari munsi y’imyaka itanu indyo yuzuye  ndetse no koroza inkoko ababyeyi barenga 170 hagamijwe kubafasha kubona indyo ikungahaye ku ntungamubiri.

Bamwe mu babyeyi baganiriye n’Itangazamakuru  bagaragaza ko kutita ku mirire y’abana babo byatumye bagira ikibazo cy’igwingira n’imirire mibi. Ni ibintu bavuga ko nyuma yo guhabwa inyigisho ku gutegura indyo yuzuye no kwita ku bana babo, batangiye kubona impinduka nziza mu mikurire y’abana.

Umuyobozi w’Akarere ka Nyaruguru wungirije ushinzwe Imibereho myiza y’Abaturage, Assoumpta Byukusenge, mu yitsa ku gusaba aba babyeyi gukomeza kwita ku mikurire myiza y’abana babo, babagaburira ibikomoka ku matungo ndetse banitabira kubajyana mu marerero hakiri kare kugira ngo babashe gukura neza haba ku mubiri no mu bwenge.

Imibare y’Umwaka wa 2025 igaragaza ko igwingira n’imirire mibi mu bana bo mu Murenge wa Kivu byari kuri 31%. Nyuma y’ingamba zashyizweho n’abajyanama b’ubuzima, zirimo kwegera imiryango ifite abana bato no kuyigisha uburyo bwo gutegura indyo yuzuye no kwita ku bana, ubu abana bafite ikibazo cy’igwingira n’imirire mibi muri uyu murenge bagabanutse bagera kuri 15%. Akarere ka Nyaruguru kavuye kuri  39.1% kagera kuri 23.9 % mu kugabanya igwingira n’imirire mibi kandi  ibikorwa  birakomeje.

Mu bijyanye n’amarerero, Umurenge wa Kivu ufite amarerero 55, mu gihe Akarere ka Nyaruguru kose gafite amarerero agera ku 1,228.